
A cidade da Coruña acollerá o vindeiro 24 de novembro unha nova edición dos Encontros Tecnolóxicos Quincemil NTT DATA, unha xornada dedicada a coñecer iniciativas empresariais galegas que aplican tecnoloxías como a intelixencia artificial e os drons para mellorar a seguridade viaria, a xestión gandeira e a resposta ante emerxencias.
O encontro celebrarase no Espazo Avenida Abanca (no número 7 da rúa Cantón Grande) e contará con tres relatorios de 20 minutos, acompañados de quendas de preguntas do público. A apertura de portas está prevista para as 19:00 horas e o comezo das intervencións para as 19:30. A actividade prolongarase ata as 21:00 horas, seguida dun encontro informal no local Copacabana.
Un dos proxectos protagonistas será AGUIA, presentado por Juan Pan, cofundador e director tecnolóxico da empresa. A iniciativa combina drons e intelixencia artificial para identificar fendas e fochancas nas estradas, unha aplicación que permite facilitar a planificación dos labores de mantemento e contribuír á seguridade viaria.
Tamén participará Aina Mena Grañó, fundadora e directora executiva de Optimuu, unha startup que emprega análise de datos e intelixencia artificial nas explotacións de vacún de leite. A súa tecnoloxía está orientada a facilitar a xestión das granxas, anticipar as necesidades de alimentación do gando e mellorar a eficiencia das explotacións.
O terceiro caso será o de Vig-Sec Drone, presentado polo seu fundador e director executivo, Rubén Gil Fontán. A empresa desenvolve tecnoloxía para coordinar drons e aeronaves tripuladas en situacións críticas, co obxectivo de mellorar a seguridade e a capacidade de resposta en incendios, rescates e outras emerxencias.
Pablo Fidalgo, senior consulting manager de NTT DATA, será o encargado de moderar o encontro, que pecha a programación de 2026 desta iniciativa organizada por Quincemil e NTT DATA.
