Ineo participa nun proxecto para fomentar a inserción laboral no eido tecnolóxico galego

As novas tecnoloxías, amais de información, tamén achegan emprego. Así o entenden a plataforma empresarial galega Ineo e máis a Confederación de Empresas TIC, Conetic, que están a traballar de xeito conxunto en Galiza para favorecer a inserción laboral de persoas sen emprego no sector vinculado ás redes da Información. Segundo informa a entidade galega, o orzamento do que se parte nesta iniciativa chamada Proxecto Insertic é de 646.300,00 euros para Galiza, Euskadi, Castela e León e Navarra, contemplándose o acceso ó mercado laboral de ata 168 desempregados. Estes e outros datos foron dados a coñecer durante unha visita de traballo do xerente de Conetic, Pedro Chillón, á sede de Ineo en Vigo.
Na xuntanza entre a entidade galega e a española participou Jorge Cebreiros (presidente de Ine) e no seu transcurso tratáronse polo miúdo temas como os obxectivos da iniciativa, que vai orientada a achegar formación profesional sobre desenvolvemento de software, técnicas en seguridade informática, xestión de redes en software libre e xestor de bases de datos. Amais diso, a finalidade é cubrir certas demandas de persoal feitas polas empresas que integran a asociación galega, sobre todo no que atinxe ás áreas de consultoría analista de deseño de software.