Estiman que os xornais de papel electrónico poderían ser unha realidade comercial na segunda metade de 2009

O papel electrónico é unha tecnoloxía que leva varios anos prometendo ser capaz de substituír ao papel tradicional, e segundo o vicepresidente para Asia de E Ink Corp, Ryosuke Kuwata, «o eido do xornais baseados en papel electrónico iniciará as súas probas a finais de 2008, e o seu negocio real comezará na segunda metade de 2009», o que podería ser unha revolución absoluta do sector da prensa, que tería pouco tempo para asumir os cambios que podería achegar esta tecnoloxía.
Nos últimos meses xa se lanzaron ao mercado múltiples lectores de libros electrónicos coa tecnoloxía de E Ink, e o propio Kindle de Amazon podería ser un adianto do que está por chegar, xa que se os dispositivos de lectura teñen conexión á Rede poden evitar os intermediarios en compras e subscricións, converténdose nun revulsivo para o sector da distribución de prensa e literatura.
Kuwata admite que a súa compañía ten os xornais no seu punto de mira, e están a manter contactos coas principais cabeceiras de prensa do Xapón para traballar conxuntamente na implantación dos xornais electrónicos. Considera que a finais de 2008 se proben múltiples terminais destinados á lectura da prensa, para avanzar paulatinamente para que antes de rematar 2009 se poida comezar a comercializar un produto real, que nun principio podería estar desenvolvido directamente por E Ink (mentres que os medios europeos parecen máis partidarios de utilizar terminais de lectura que estean xa no mercado, enfocando o seu negocio só aos contidos).