Entrega de diplomas TIC e certificacións para as empresas de Ineo

Ineo e Caixanova veñen de facer entrega dos diplomas para os directivos e mandos intermedios da dita asociación do eido tecnolóxico galego que participaron no Curso para Directivos TIC desenvolvido pola Escola de Negocios da entidade financeira en Vigo e na Coruña. O acto, que se desenvolveu este luns perante a presenza do director xeral adxunto de Caixanova, Juan Díaz Arnau e o presidente de Ineo, Jorge Cebreiros, serviu amais para salientar o labor e os esforzos das empresas da asociación TIC na súa arela de acadar avais de calidade como garantías da súa xestión e dos seus produtos. Neste senso, sinalar que amais da achega dos diplomas do curso, o encontro acolleu a entrega de certificacións de calidade entre compañías integrantes de Ineo.
Tanto a obtención de diplomas como o de certificados, sinala a entidade TIC nun comunicado, veñen a valorar o traballo das empresas do sector na mellora das dúas capacidades e no medre dos seus niveis de produtividade co gallo de competir nun mercado cada vez máis esixente. “Trátase de non deixar nunca de formarse e de interesarse por todo o que supoña unha mellora das capacidades do persoal”, comentou Díaz Arnau no transcurso do acto.