O Firefox elixe a Chuza! coma fonte predeterminada de titulares de actualidade

O pasado 1 de outubro se estreou a versión beta do Firefox 3.0.3 en galego, e o navegador da Fundación Mozilla continúa a avanzar dende aquela na súa adopción do galego coma lingua oficial, de xeito que xa case ten completada a tradución da descrición do Firefox na súa web, polo que parece que en breve imos ver cómo a versión en galego do navegador se oficializa.
Neste mesma liña dende Chuza! veñen de informar de que o equipo de tradución ao galego do Firefox 3 decidiu elixir esta plataforma de recomendación de novas coma fonte para alimentar a sección de últimos titulares que aparece na aplicación cando se fai unha instalación dende cero.
Entendemos así que xa falta menos para que non só o Firefox estea en galego, senón para que a Fundación Mozilla tamén trate á nosa lingua como ao inglés, o español ou o portugués.