O Proxecto Natal soportará multiusuario e detectará os dedos dos xogadores

O Proxecto Natal foi a grande sorpresa de Microsoft durante o E3, pero as presentacións do sistema non foron moi exhaustivas xa que estaban integradas nunha conferencia xenérica de Microsfot, e pasada a romaría imos coñecendo máis detalles deste proxecto que promete sorprendernos nos vindeiros anos.
Así, Kudo Tsunoda, director do proxecto, asegurou que este sistema de control orientado aos movementos do usuarios (para o que emprega unha cámara especial) é capaz de funcionar para xogo multiusuario, pois distingue entre distintas figuras, tratando os seus movementos por separado.
E estes detalles non quedan aí, senón que o sistema que están a desenvolver para Microsoft non só detecta os movementos do corpo, senón que incluso recoñece os movementos dos dedos, aínda que este factor dependerá da distancia do usuario da cámara.
Por desgraza, tamén confirmaron que o Proxecto Natal non verá a luz en 2009, de xeito que haberá que agardar a 2010, cando posiblemente o produto estará maduro para chegar ao mercado (aínda que non ten unha data de lanzamento determinada).