Os profesores participantes en Voz Natura recibirán formación sobre a creación de blogs

O programa Voz Natura ofrece aos profesores participantes a posibilidade de asistir a sesións formativas gratuítas e homologadas pola Consellería de Educación co obxectivo de capacitar aos docentes na creación e administración de blogs, máis concretamente da plataforma WordPress, coma ferramenta para dar a coñecer o proxecto e inquedanzas ambientais do centro e no punto de encontro dos alumnos e profesores involucrados na iniciativa.
Dende o martes ao xoves será Vigo a cidade na que recale esta iniciativa formativa, que entre os días 3 e 5 de novembro chegará a Santiago coa intención de formar aos docentes de Barbanza, Muros e Noia. O 10 de novembro comezarán as xornadas en Viveiro, o 17 de novembro en Ferrol, o 24 de novembro en Pontevedra e o 1 de decembro en Ourense, desenvolvéndose cada curso entre as 18:00 e as 21:00 horas durante 3 días consecutivos.