Apple denuncia a HTC por infrinxir 20 patentes relativas á interface de uso do iPhone

A xornada de hoxe na prensa tecnolóxica norteamericana parece centrada especialmente nun tema: a denuncia que Apple vén de presentar contra HTC por infracción de patentes. Aínda que é moi habitual nos EE.UU. este tipo de reclamacións, o feito de que HTC estea a liderar o mercado dos terminais co sistema operativo Android (considerados a principal alternativa ao iPhone) fixo que o asunto estea no ollo do furacán, pois as 20 patentes que defende a compañía de Cupertino refírense á interface de uso do iPhone e o propio Steve Jobs declarou que «podemos sentar e ver aos nosos competidores roubar os nosos inventos patentados ou podemos facer algo ao respecto. Decidimos facer algo» ao que engadiu que «pensamos que a competencia é saudable, pero os competidores deberían crear a súa propia tecnoloxía orixinal, e non roubar a nosa».
Entre as patentes reclamadas por Apple estarían as que definen o desbloqueo dun dispositivo mediante xestos, o desprazamento por unha listaxe nunha pantalla táctil ou incluso a adaptación do terminal ao usuario valéndose de sensores.
Resulta rechamante que Apple enfocase a súa ofensiva a HTC, pois as patentes vulneradas corresponderían ao software (concretamente o sistema operativo Android), polo que nos analistas entende que este paso de Apple busca frear aos seus competidores, para poder conseguir certa vantaxe no sector dos smartphones, o que pode facernos lembrar o feito de que o Nexus One non incluía soporte multi-táctil no seu lanzamento, segundo parece, por medo por parte de Google de vulnerar unha patente de Apple.
Tamén habería que lembrar que, aínda que a demanda de Apple prosperase, só afectaría ao mercado norteamericano, posto que ese tipo de patentes non están recoñecidas a nivel global, e por fortuna a lexislación europea non recoñece as patentes de software, o que en boa medida protéxenos de demandas como as mencionadas, que dan a entender que Apple posúe o concepto de teléfono con pantalla táctil e capacidades de conexión á Rede, o que dista moito da realidade.