Nova sentenza que determina que ligar contidos protexidos non é delito

Mentres que o Goberno segue adiante coa chamada Lei Sinde, os xuíces continúan a ditar sentenzas considerando que subministrar ligazóns non constitúe delito, coma vén de dilucidar un maxistrado do Xulgado do Penal nº 1 de Barakaldo (Bizkaia), por unha causa contra os responsables de FenixP2P, formando parte da acusación o Ministerio Fiscal, ADeSe e Promusicae.
No auto xudicial absolve aos acusados dun delito contra a propiedade intelectual (cabendo aínda apelación a tal decisión) por considerar que publicar ligazóns a contidos protexidos non supón a distribución dos mesmos, de xeito que a actividade denunciada non constituiría delito «a maior abundamento e ao unísono coa posición igualmente adoptada pola maioría das resolucións xudiciais recaídas sobre tal extremo con anterioridade», aínda que o maxistrado tamén comenta «a controvertida Lei actualmente en trámite parlamentario para a debida como esperada eliminación, real e efectiva, da posibilidade de descargas na rede non autorizadas polos titulares dos dereitos de propiedade intelectual», que tras o desenvolvemento do seu regulamento podería definir o que se entende por servir contidos, podendo chegar a mudar a dirección da presente sentenza.
Este caso sería o primeiro desta características en celebrarse de xeito completo pola vía penal, posto que en casos precedentes as causas foran arquivadas antes da celebración dun xuízo completo.