Twitter mellora as súas buscas e facilita a publicación de fotografías

Hoxe é un día de importantes anuncios para Twitter, pois o servizo de microblogging anunciou oficialmente a renovación do seu buscador interno, que xa non só amosará tuiteos sobre as nosas buscas ou amosará a información sobre os temas do momento, sen´no que tamén presentará fotografías e vídeos entre os seus resultados, facendo máis doada a localización de contidos nesta plataforma.
Ademais, para facilitar estas buscas tamén estrean un engadido oficial para Firefox que permite empregar a barra de busca do navegador para realizar buscas en Twitter. A instalación do novo engadido resulta tan doada como premer un botón e nin sequera precisa do reinicio do navegador para utilizar a nova funcionalidade, que axiliza as buscas en Twitter. Este complemento só funciona no Firefox 4.0 ou superior.
A xente de Twitter tamén anunciou que, ante a importancia que estaba a tomar o seu servizo na publicación de fotografías na web, ían facilitar este proceso, polo que chegaron a un acordo con Photobucket para a hospedaxe de fotografías, que xa está dispoñible a través de Twitter.com e que en breve incorporarase ás aplicacións móbiles de Twitter. Os usuarios que non teñan smartphones tamén poderán remitir as imaxes a través de MMS.

Vídeo no que ilustran a incorporación de imaxes e vídeos nos resultados de busca en Twitter