A CEG conmemora o seu 30 aniversario cun foro empresarial e unha homenaxe ao seu fundador

Este mércores 9 de novembro, para quen non o saiba, os empresarios da nosa terra celebran unha data de importancia para o seu pasado, presente e futuro: os 30 anos da confederación que lles dá acubillo, azos e apoio dende un día como o devandito hai agora tres décadas: a Confederación de Empresarios de Galicia (CEG). Estamos a falar, xa que en Código Cero fálase en clave TIC, dunha entidade arestora mergullada de cheo nun proceso extensible ao tecido produtivo galego na súa totalidade, o proceso de afianzarse nas redes e tirarlles o máximo proveito. Exemplos disto é a súa aposta pola divulgación TIC ou a súa estratexia a prol da internacionalización a través da web Salt. Segundo nos conta dende El Progreso o presidente da Asociación Galega de Empresas TIC (AGESTIC), José María López Bourio, a celebración dos 30 anos virá marcada por un “importante acto no que se lle fará merecidamente unha homenaxe ao seu presidente fundador, o lucense Álvaro Rodríguez Eiras”.
Bourio, un dos máximos implicados na posta en marcha da CEG e do seu posterior desenvolvemento (primeiro como vicepresidente e logo como secretario xeral, colaborando ombro con ombro co homenaxeado, Rodríguez Eiras), fai saber no devandito artigo, publicado este 7 de novembro na edición papel do xornal lucense, que un dos eixes fundamentais da CEG segue a ser o seu compromiso a prol dos intereses dos empresarios, fronte aos recelos dos políticos e da parte dos cidadáns que quixeron ver, ao comezo da súa andaina, vontade política. “Pasaron 30 anos e nós seguimos a ser, e seremos, unicamente empresarios”, comenta Bourio, ao fío do que acontece estes días de campaña preelectoral que xa estamos a vivir. Volvendo á celebración da CEG, dicir que collerá corpo en Santiago, no Auditorio de Galicia, no foro empresarial Claves para a recuperación económica, inserido no programa de actividades de celebración dos 30 anos de vida da Confederación. O foro, que contará coa presenza do presidente da Xunta, Alberto Núñez Feijoo, abranguerá diversos relatorios e mesas redondas sobre o noso potencial innovador para saírmos da crise produtiva e, a partir das 9.30 horas, a imposición dunha insignia corporativa ad honorem ao presidente fundador da CEG, Álvaro Rodríguez Eiras.