PéZcalo pon en marcha unha campaña para facilitarnos o enleado trámite do agasallo de Nadal

Estes días previos ás festas de Nadal, esas festas que teñen o poder de adiantarse cada ano un pouco máis (se non chega a ser polo Samaín, encanarían xa co verán), quen máis que menos pode chegar a agradecer que lle recomenden en qué porta petar á procura dun agasallo. Se, ademais, a cousa queda aquí, mellor que mellor. Nestas andan os compañeiros de PéZcalo, tenda en liña de produtos de pesca (da que xa temos falado en Código Cero) dende a que se vén de lanzar unha campaña para que todo aquel internauta que ande doente por agasallar do xeito máis cómodo e fiable poida facelo sen necesidade de dar coa cabeza contra unha parede. A campaña chámase Fai feliz a un pescador.
Segundo nos contan dende a web de EGANET, asociación na que se integra a tenda en liña, a iniciativa xurdiu co obxectivo de introducir un pouco de orixinalidade nesa aburrida paisaxe que é a dos regalos de Nadal, con esta teima que temos de levar garabatas e perfumes a quen probablemente estea farto de ámbalas cousas. A clave disto, informan, está nas Tarxetas Agasallo que PéZcalo pon á venta na súa web con prezos que oscilan entre os 30 e os 130 euros e que os compradores poderán recibir ben por email, ben por correo certificado. A caducidade das mesmas é dun ano, o que deixa un tempo moi razoable para que o pescador ou pescadora pense ben por que produto quere cambiala.
A campaña parte dun reto importante a ter en conta: chegar ás familias dos seareiros da pesca, cousa que, por específica, non semella doada. Para solucionalo, dende PéZcalo puxeron en marcha un sistema de divulgación baseado en correos electrónicos e uso de redes sociais mediante o cal a persoa potencialmente agasalladora pode comunicarlles aos familiares ou amigos, a través da empresa, a opción de mercar unha das devanditas tarxetas, “aforrando deste xeito o comprometido trámite de ter que manifestar a nosa preferencia ou o risco de obter un agasallo que non nos guste”.

Vídeo promocional da campaña