Telefónica quere botarlle unha man aos novos talentos

Telefónica presentou esta semana un programa para procurar canteira de novas promesas do eido TIC. Falamos do programa Talentum, un feixe de bolsas e recursos variados para estudantes universitarios. O programa vén en dúas metades: por unha banda Talentum Universities (bolsas de longa duración para achegar á mocidade a realidade empresarial) e pola outra Talentum Startups (axudas para converter en realidades ideas de innovación social do máis variado). O primeiro vai dirixido a estudantes universitarios de menos de 30 anos (Enxeñaría de Telecomunicación, Industriais, Informática, Dereito, etc) fornecéndoos de 500 bolsas cunha duración dun ano.
A idea da operadora é fomentar “o emprego estable e de calidade, amais de contribuír á renovación do talento e ao proceso de transformación de Telefónica cara a unha compañía máis global e orientada ao cliente”. Esta liña de actividade, Talentum, darase a coñecer a través dunha xira por distintos campus do ámbito estatal. O programa estará apoiado por profesionais da compañía, que se encargarán de explicar os detalles do mesmo (estrutura da empresa, proxectos máis senlleiros –sobre todo de mobilidade-, ou distintos exemplos de servizos en cuxo desenvolvemento participase xente nova).
Talentum Startups é un plan para estudantes de primeiros anos de carreira que queiran mellorar a sociedade a través da tecnoloxía. Permitiralles desenvolver as súas ideas de innovación social co apoio da operadora a través dunha bolsa na academia Wayra. O programa, informa Telefónica, “aspira a construír a primeira rede universitaria de emprendedores sociais techies, e o seu obxectivo é fomentar as habilidades da mocidade estudante con espírito solidario”. Darase prioridade a xente que veña de estudos tecnolóxicos, como enxeñeiros informáticos e telemáticos ou semellantes.