Informática El Corte Inglés completa a súa oferta en redes e comunicacións da man de Huawei

Informática El Corte Inglés, empresa de consultoría TIC inserida no grupo do mesmo nome, vén de asinar un acordo coa multinacional tecnolóxica Huawei Enterprise para completar e mellorar a súa achega en redes e comunicacións e optimizar, deste xeito, o servizo que subministra ás grandes empresas e institucións públicas. Segundo fai saber a compañía española, o acordo sitúaa nun nivel claro de privilexio, ao adherirse ao programa de canle de Huawei en España co nivel máis alto de certificación, o de Business Partner Platinum.
Xa nun nivel máis concreto, a idea é a de pór no mercado estatal unha oferta conxunta e global de solucións e servizos con potencial “para asegurar a continua renovación das infraestruturas de comunicacións nas máis diversas organizacións, proporcionando un soporte eficaz á súa actividade”.
Lembrar que Huawei Entrerprise é unha organización innovadora que dispón arestora dun equipo de 60.000 profesionais repartidos por todo o mundo, dedicados a tarefas de Investigación e de Desenvolvemento e con arredor de 40.000 patentes propias no eido das novas tecnoloxías. Huawei, asemade, está presente dende hai máis dunha década en España. O acordo asinado con Informática El Corte Inglés está vinculado á creación, o ano pasado, dunha nova división de empresas con solucións dirixidas ás corporacións, en cuxo eido a consultora tecnolóxica centraliza a súa visión global. Os servizos de consultoría, implantación e soporte dos recursos de Huawei prestaranse dende o Centro Experto de Integración de Sistemas de Informática de El Corte Inglés, que conta con profesionais xa certificados nas plataformas do fabricante asiático e mergullados nun continuo proceso de formación e actualización das súas potencialidades.