Emprendiápolis amosa este venres as canles europeas de financiamento para empresas tecnolóxicas

Este venres 22 de xuño celébranse en Santiago uns encontros de natureza práctica para toda aquela persoa que queira pór en marcha un proxecto tecnolóxico de mercado e desexe ter en conta, ben preto, tódalas portas europeas nas que petar para obter combustible orzamentario. Estamos a falar dos Encontros Emprendiápolis, que organizan unha nova actividade formativa encamiñada a amosar as vías de financiamento europeas para Empresas de Base Tecnolóxica (EBT). De matrícula gratuíta, diríxese a profesionais da área de creación de empresas xurdidas do coñecemento e/ou a tecnoloxía, ben como persoal técnico ou como promotores/as. A cita será o venres no Edificio Emprendia.
Segundo informa a Universidade de Santiago, a xornada proposta por Emprendiápolis exporanse as diferentes vías de financiamento europeo a partir da experiencia de expertos en preparación de propostas e coordinación de proxectos, ao tempo que se mostran casos prácticos de empresas que se beneficiaron deste tipo de axudas.
O número de prazas ofertado está limitado, porén, “poderase seguir o seu desenvolvemento en streaming a través de USC TV para, desta forma, facilitar a afluencia de público evitando desprazamentos”, infórmase.
A continuación, damos conta do programa.
09.30 – 12.00 Mesa Redonda
Moderador: Senén Barro Ameneiro, Presidente da Rede Emprendia.
Relatores:
· Martín Cacheiro Martínez. Técnico da Oficina de Proxectos Europeos da USC.
· Manuel Veloso Espiñeira. Socio Consultor de EOSA.
· Ana Bouzas Lorenzo. Coordinadora do Proxecto Erasmus para Emprendedores Novos da USC.
12.00 – 12.30 Pausa café
12.30 – 14.30 Casos de éxito
Moderador: Ricardo Capilla Pueyo, Director da Axencia Galega de Innovación da Xunta.
Relatores:
· Daniel Fernández Mosquera. Xestor de Innovación Nanogap.
· Marta Arenas Romasanta. Directora Técnica de Alvariza Asistencia Técnica Ambiental.
· Ana Isabel Rey Asensio. CEO Biovía Consultor Ambiental.