O OMV coruñés Ocean’s conta con novas tarifas para profesionais e empresas

O operador móbil virtual con sede na Coruña con cobertura de Movistar, Ocean’s, segue a renovar as súas tarifas, e desta volta pensa en autónomos e empresas, concretamente con 2 series de tarifas: as FreeDom e as X-pymes.
As tarifas FreeDom queren dar facilidades a emprendedores e autónomos combinando minutos a destinos fixos e móbiles nacionais as 24 horas do día e conexión á Internet a prezos competitivos e permitindo facerse tamén con móbiles subvencionados. O plan básico sería a tarifa FreeDom 8, que por 8 euros/mes inclúe 120 minutos a móbiles e fixos nacionais; seguida por FreeDom 18, que por 18 euros/mes inclúe 200 minutos en chamadas, 300 mensaxes de texto e 500 Mbytes de acceso á Rede a máxima velocidade e, finalmente, a tarifa FreeDom 28 inclúe, por 28 euros/mes, 350 minutos en chamadas, 300 mensaxes de texto de balde e 500 Mbytes de transferencia de datos a máxima velocidade.

Para empresas Ocean’s propón as súas tarifas XPyme, que teñen en común 1.000 minutos a números propios, o envío de 300 mensaxes de texto, podendo elixir o número de minutos en chamadas a fixos e móbiles nacionais e o volume de transferencia de datos contratado. Para as compañías que non precisen de Internet no móbil teriamos as tarifas de 9 ou 21 euros/mes con 100 e 300 minutos en chamadas respectivamente; mentres que con 500 Mbytes de transferencia a máxima velocidade teriamos tarifas de 15, 25, 35 e 45 euros con 100, 250, 450, 600 minutos en chamadas e, por 65 euros/mes 1.000 minutos en chamadas e 1 Gb de transferencia de datos a máxima velocidade. As tarifas XPyme con datos inclúe 300 mensaxes de texto.
Compre destacar que o catálogo de terminais que subvenciona Ocean’s é bastante variado, contando con terminais con Android bastante populares (Samsung Galaxy Mini, Sony Xperia Tipo/U/S, ZTE, Skate, Samsung Galaxy Note, Samsung Galaxy S II/III, HTC Desire X ou Motorola Defy entre outros), algúns terminais con Windows Phone (HTC Radar, Nokia Lumia 800, 710 e 610), móbiles BlackBerry e mesmo o iPhone 4/4S, dos que moitos poden conseguirse por 0 euros coa meirande parte das tarifas mencionadas.