Microsoft incluirá no seu novo sistema operativo medidas para evitar as copias ilegais

Windows “á Vista” e con actitude moi severa de cara ás copias piratas. Así van ser as distribucións do novo sistema operativo de Microsoft, un programa que incluirá en si mesmo medidas para evitar que se fagan reproducións ilegais, establecendo un prazo de trinta días para ser rexistrado como “copia legal”, pasado o cal o usuario será testemuña dunha baixada de operatividade que, logo de restrinxir o emprego do navegador desembocará no peche do programa (imposibilitando tamén a apertura de documentos dende o escritorio ou mesmo o emprego doutros programas vencellados ó Windows).
O que se pretende con esta medida (di Microsoft) non é impedir o emprego (baixo mínimos, iso si) das copias piratas, pero si dar a entender que a diferenza entre estas e as legais é tan grande que compensa o desembolso económico. E para que ningún afeccionado a adquirir copias piratas esqueza este miúdo detalle, Microsoft vai incluír no curruncho dereito inferior da pantalla unha mensaxe desas que pode chegar a esgotar a paciencia do máis indolente dos internautas: “Esta copia de Windows non é orixinal”.