Orange podería mercar Simyo nos vindeiros días

Antes de rematar o ano France Télécom a través da súa marca Orange ten previsto a adquisición por preto de 30 millóns de dólares do Operador Móbil Virtual (OMV) de KPN, Simyo, o que parece ser un paso máis para facerse tamén polo operador móbil de Telia Sonera, Yoigo, durante os primeiros meses de 2013, operacións que mellorarían considerablemente a súa posición no noso mercado.
Dende ElEconomista aseguran que a adquisición de Simyo por parte de Orange podería materializarse a semana que vén, mentres que os achegamentos a Yoigo realizaríanse con máis calma (pois outras compañías como Vodafone tamén poderían ter interese en facerse con este operador). A compra de Simyo por parte de Orange sería a primeira grande operación deste tipo en España dende hai uns 5 anos, cando Vodafone adquiriu Tele 2 por 775 millóns de euros, xa que nos últimos tempos os operadores optaron por consolidarse a través dos seus negocios locais en vez de absorber aos seus rivais para facer o propio.
Actualmente Orange conta con 11,8 millóns de usuarios móbiles en España, e de integrar os 400.000 de Simyo e os 3,7 millóns de Yoigo podería achegarse significativamente aos 16,3 millóns de Vodafone, avanzando no seu obxectivo de converterse no segundo operador do país.