VirtualTEC e unha aplicación para a xestión de campamentos, gañadores no certame de proxectos tecnolóxicos de Ourense

Este xoves 13 de decembro entregábanse en Ourense os premios da edición número doce do Concurso de Proxectos Tecnolóxicos. Cun nivel moi alto de participación -17 traballos presentados- dous estudantes da Universidade de Vigo facíanse cos galardóns máis salientables: Jonathan Juncal (estudante de Enxeñaría de Telecomunicación) gañador no apartado de traballos de fin de grao co seu teclado VirtualTEC para móbiles Android destinado a persoas cunha elevada discapacidade motora; e Antonio Martínez (da Escola Superior de Enxeñaría Informática de Ourense),quen acadaba o primeiro posto na modalidade de fin de mestrado coa súa aplicación para o control e a xestión dun cámping.
O segundo premio da modalidade de proxectos fin de grao foi para un sistema de xestión de contidos para medios dixitais deseñado por Ramón Antonio Parada, da Universidade da Coruña. E na categoría de fin de mestrado, o segundo e o terceiro posto ían para dous mozos da Escola Superior de Enxeñaría Informática: José Manuel Pintor, coa súa ferramenta para mellorar a calidade no cálculo dos parámetros reprodutivos en peixes, e para Juan José Ferreño, co seu sistema de captación e integración de datos clínicos no contexto de vixilancia da infección nosocomial, contraída por pacientes ingresados en recintos de atención á saúde.
Engadir á listaxe dos premiados ao estudante da Universidade da Coruña, Juan Font, polo seu traballo de análise, deseño e implementación dun sistema de audio para plataformas de vídeo sintético. Cómpre subliñar que o recoñecemento ao proxecto con máis éxito en Facebook foi para Pablo Puig, tamén da UDC, por un proxecto de estudo e integración de sistemas sensoriais para a navegación de robots móbiles en contornas complexas.
Os encargados de entregar os premios foron: Enrique Barreiro, director da Escola Superior de Enxeñaría Informática do campus de Ourense; Celso Barbosa, presidente do Comité Executivo de Expourense e da Cámara de Comercio de Ourense, e Rosendo Luís Fernández, vicepresidente da Deputación Provincial de Ourense.