R achega aos empresarios de Melide unha serie de ofertas de servizos para mellorar a súa competitividade

O operador R está a ampliar horizontes. Ou sexa, que quere ofrecer algo máis ca tecnoloxía de cable e fibra óptica e os consecuentes servizos de telefonía fixa e móbil, Internet e Televisión. En definitiva, que máis alá de fornecer acceso aos servizos de telecomunicacións, quere repercutir directamente na actividade empresarial dos nosos profesionais, facéndolles o seu día a día máis doado e eficiente. Nesta liña insírese o acordo que veñen de asinar a Asociación de Empresarios Terra de Melide e máis a compañía galega, un achegamento que se dirixe a aumentar a competitividade das empresas da dita entidade a través dunha “mellora significativa en prezo e servizos con novas ferramentas de comunicación”.
Máis polo miúdo, os empresarios de ASETEM teñen xa ao alcance da man, en virtude do dito acordo, a nova oferta integrada de servizos de R, incluído o fornecemento de varios combos do operador galego (servizos paquetizados) adaptados ás necesidades de cada negocio e encamiñados “a potenciar o desenvolvemento empresarial e o incremento da competitividade por medio das novas tecnoloxías”, sinalaron os participantes na formalización do acordo.
Meténdonos en materia sobre o mesmo, dicir que se establece ao seu abeiro que os locais que só precisan dunha liña de teléfono fixo R dispoñen dunha oferta do combo negocio despreocupín por 29 euros ao mes e de 79 euros para as oficinas que precisan de máis dun posto de voz. Estes prezos “especiais” aplícanse ao contratar de xeito simultáneo dúas liñas de móbilR. Por outra banda e facendo referencia ao acceso a Internet, sinalar que estes combos facilitan 20 mbps de baixada e 2 de suba con Wi-Fi e opcións de velocidade de ata 100 mbps. A oferta inclúe tamén un mínimo de 120 minutos en chamadas a móbiles non R dende a liña de fixo e de 300 minutos a móbiles R.
A maiores, segundo informou R, os empresarios da entidade melidense teñen ao alcance da man a posibilidade de tirar partido de opcións converxentes de fixo e móbil, como por exemplo o servizo multiring, que permite recibir á vez chamadas no fixo e no móbil ou desvialas dun a outro segundo se prefira. O convenio abrangue tamén descontos de ata o 50% nas liñas de teléfono fixo adicionais para os negocios que demanden de máis postos de voz.