Telefónica entra no Pacto Dixital de Galicia coa achega dun Centro de Emprendemento TIC no Gaiás

Na mañá deste 11 de novembro, asinábase un acordo por parte do presidente da Xunta de Galicia -Alberto Núñez Feijoo- e o presidente de Telefónica -César Alierta- polo cal ficaba selada a adhesión do operador ao Pacto Dixital de Galicia, un pacto no que tanto o Goberno galego coma as empresas asinantes asumen un decálogo de compromisos para atraer investimento a Galicia, favorecer a internacionalización da PEME galega e acadar a colaboración activa entre as grandes e pequenas firmas de cara ao medre do sector. Cómpre dicir que Telefónica súmase así ás 11 empresas tecnolóxicas -HP, Indra, Everis, Tecnocom, Iecisa, Satec, Televés, R, Altia, Coremain e o Clúster TIC Galicia- que o pasado mes de xullo subscribiron este acordo co Goberno galego, o primeiro deste tipo que se realiza en España e que ten como finalidade investir na Comunidade e contribuír a converter Galicia nun punto tecnolóxico de referencia.
Emporiso, con esta resolución quérese que as empresas asinantes se comprometan a colaborar de xeito activo na captación de financiamento en programas como o Horizonte 2020 para o desenvolvemento de novas liñas de negocio e novos produtos en Galicia. Tamén se subliña o valor de apostar polo rural galego coa extensión de tecnoloxía de nova xeración; a apoiar aos emprendedores dixitais de Galicia e a participar como mecenas dixitais impulsando actuacións que capaciten a cidadanía. Amais disto, búscase a vontade de garantir (mediante un programa de bolsas) a incorporación ao mercado laboral de universitarios e estudantes de Formación Profesional Obrigatoria do eido tecnolóxico. Pola súa banda, o Goberno galego comprometeuse a elaborar a Lei de desenvolvemento dixital para a transformación de Galicia cara a unha economía baseada no coñecemento.

A primeira medida que Telefónica adoptará no marco deste pacto é a posta en marcha dun Programa de Apoio ao Emprendemento TIC en Galicia co obxectivo de detectar iniciativas de proxectos tecnolóxicos con alto potencial de crecemento, con pegada a longo prazo na Comunidade e que, á súa vez, permitan o descubrimento de talento e o fortalecemento do tecido empresarial galego.
Engadir, por último, que a primeira fase do programa ten como obxectivo a creación dun Centro de Emprendemento TIC, que ocupará unha superficie de 420 metros cadrados nas instalacións da Cidade da Cultura, o cal entrará en funcionamento na primavera de 2014. O dito centro achegará a 60 emprendedores do eido tecnolóxico (na súa etapa inicial) un espazo para desenvolver os seus proxectos, recibir asesoramento, orientación e formación.
A segunda fase do proxecto centrarase na constitución e desenvolvemento dunha aceleradora de proxectos tecnolóxicos de alto potencial en Galicia, con capacidade para impulsar ata 8 iniciativas TIC.