Preparan un novo conector USB reversible

O USB 3.0 Promoter Group anunciou que está a traballar nunha nova xeración de conector USB, o tipo C, que integrará as tecnoloxías USB 3.0 e USB 2.0, e está a desenvolverse intentando conseguir un deseño máis delgado dos produtos, así como un dispositivos máis doados de utilizar.
O conector USB tipo C terá un deseño totalmente novo, un tamaño semellante ao dos conectores USB 2.0 Micro-B, funcionará nos dous sentidos (facilitando extraordinariamente a súa conexión, na liña do que fai Apple co seu conector Lightning), soportará carga escalable e estará pensado para futuras melloras no bus USB.
Este novo conector sería totalmente distinto aos actuais, de xeito que os trebellos que o integren non poderán conectarse directamente con dispositivos actuais, aínda que xa están a traballar nas especificacións dos adaptadores que facilitarán a comunicación entre portos de distinto tipo.
Un dos motivos para a preparación deste novo conector é a emerxencia de smartphones e tablets, que fai necesario optimizar os conectores empregados tanto para a transferencia de datos como para a achega de enerxía, adoptando un factor de forma que sexa axeitado para uns dispositivos cada vez máis delgados.
Prevese que as especificacións do USB tipo C estean dispoñible para a súa revisión no primeiro trimestre de 2014, para contar cunhas especificacións finais a mediados do ano que vén.