AS Computer MacCenter celebra o seu 23 aniversario con reaperturas, sorteos e descontos

A empresa galega AS Computer MacCenter, con sedes en Santiago, Vigo e Ourense, está a celebrar estes días o seu 23 aniversario. As actividades comezan este xoves mesmo, coa reapertura da tenda Apple Premium Reseller da Avenida de Barcelona (número 4) en Compostela. Alí levaranse a cabo, entre outras cousas, sorteos especiais de agasallos entre os clientes que asistan á celebración, das 17.00 horas cara adiante. Por outra banda, a empresa tamén informa que durante os vindeiros días (de hoxe ata o sábado) haberá un dez por cento de desconto en toda a gama de computadores Apple que achegan os seus establecementos.
Lembrar que AS Computer foi fundada en 1991 en Santiago de Compostela, contando daquela cun establecemento na rúa Rosalía de Castro, que servía de acubillo e punto de encontro para os seareiros dos produtos Mac da nosa terra. Ao longo dese tempo, a empresa galega foi recoñecida como distribuidora e servizo técnico autorizado de Apple e logo xa como Apple Center e Apple Premium Reseller. En xullo de 2007, a firma abriu tenda en Vigo (Novo Centro Apple Premium Reseller da Porta do Sol), en marzo de 2012 as novas instalacións da Avenida de Barcelona en Santiago e en decembro dese mesmo ano inaugurou dependencias en Ourense. Todas estas tendas teñen un denominador común: ofrecer o máis amplo rango de software e accesorios da marca Apple, sendo Mac, iPhone e iPad os seus principais piares-produto. En definitiva, AS Computer ofrece “todos os produtos, servizos, e formación que un cliente de Apple pode necesitar”, informa a empresa galega.