Record de portabilidades móbiles en xaneiro

A Comisión Nacional do Mercado da Competencia vén de publicar a súa nota mensual do sector das telecomunicacións correspondente ao pasado mes de xaneiro, destacando por contabilizar o rexistro histórico máximo en portabilidade móbil con 674.720 números portados, o que supón un incremento interanual do 6,5%, mentres que a telefonía fixa tamén rexistrou un volume moi elevado (184.688 portabilidades) principalmente asociadas a produtos empaquetados de voz e banda ancha.
Aínda que os datos de portabilidade móbil foron moi altos, o importante volume de ganancia de liñas de contrato (209.843) non conseguiu compensar a caída en prepagamento (198.879) e en datacards (32.407) de xeito que no mes de xaneiro rexistraríase unha redución de 21.443 liñas móbiles. Como vén a ser habitual, a meirande parte da perda neta de liñas corresponde a Movistar (155.570) e a Vodafone (73.360), mentres que Orange perde só 2.020 liñas, o que contrasta co resultado de Yoigo, que gaña 72.260 liñas, mentres que as 137.240 liñas restantes van a parar aos diferentes operadores móbiles virtuais.
O único segmento que continúa a medrar é o da banda larga, que sumou 77.974 liñas, encadeando 18 meses consecutivos de crecemento, chegando aos 12,3 millóns, o que supón un incremento interanual do 5,9%. Cómpre destacar que a meirande parte das novas contratacións de banda larga (39.485) corresponden a liñas FTTH.