Microsoft e HP amosan as súas estratexias en recursos humanos nun congreso de APD

A Asociación para o Progreso da Dirección (APD) vén de informar que contará con algunhas das principais empresas do sector tecnolóxico-dixital para falar polo miúdo das súas respectivas metodoloxías para dispor dos profesionais que de maneira máis axeitada aseguren o medre e o desenvolvemento das compañías. Deste xeito, empresas como HP e Microsoft amosarán en detalle as súas estratexias para acadar o capital humano que mellor acaia ás súas necesidades, xunto con compañías potentes no mercado como Ford, Acciona, Faurecia, Gas Natural ou Air Nostrum. A cita será o vindeiro 28 de maio en Valencia, na primeira edición do Congreso Nacional de Recursos Humanos que organiza APD.
Nela daranse cita 1.000 directivos especializados en busca e xestión de traballadores procedentes de toda España. O encontro servirá para “expor as últimas tendencias na xestión do talento e as claves para liderar o capital humano tras a crise”. O congreso desenvolverase “a través de relatorios maxistrais” como os de Eduardo Serra, presidente da Fundación Transforma España, paneis de expertos sobre as diferentes visións entre Universidade e Empresa ou mesas de debate nas que se debullarán “retos actuais na xestión de recursos humanos”.
A inauguración correrá a cargo de Enrique Sánchez de León, director Xeral de APD, e Francisco Ros, presidente da Zona Levante de APD. María Garaña, presidenta de Microsoft España, clausurará o certame cunha exposición sobre como vender desde o departamento de recursos humanos.