Santiago acollerá os vindeiros días un completo seminario sobre calidade no software

Os vindeiros días teremos en Compostela unha oportunidade para introducirnos de cheo nas metodoloxías actuais máis axeitadas para acadarmos o mellor traballo posible en materia de programación e desenvolvemento de software, e axeitadas tamén para acreditar e certificar ese traballo ben feito. A dita “oportunidade” vén da man do Colexio Profesional de Enxeñaría en Informática de Galicia, CPEIG, e maila Axencia para a Modernización Tecnolóxica de Galicia, AMTEGA, que organiza o Foro para a Calidade do Software os días 9 e 10 de xuño na Cidade da Cultura en Santiago de Compostela.
As temáticas a abordar no foro versarán sobre aspectos como ISO 9126, ISO 25000, débeda técnica, métricas, integración continua, axilidade, auditorías, externalización do desenvolvemento, etc. O obxectivo dos responsables do seminario é “propor un marco de reunión, debate e divulgación para investigadores, empresas, universidades e profesionais interesados en aumentar o valor que achegan aos seus negocios, en base ao control e optimización da calidade dos produtos que o sustentan”. Máis polo miúdo, perséguese coñecer as diferentes normas de xestión de calidade no ámbito das TIC, compartir experiencias de implantación, amosar casos de éxito de empresas e elaborar mesas redondas por temáticas.