O CDTI dará a coñecer en FEUGA as súas oportunidades de financiamento da innovación

O Centro para o Desenvolvemento Tecnolóxico Industrial (CDTI) celebra o vindeiro 11 de xuño en Santiago un evento para dar a coñecer os seus actuais e futuros programas de financiamento para proxectos de innovación. A cita, a desenvolver na sede de FEUGA, será de 10.00 a 14.00 horas. Lembrar que o CDTI é unha entidade de referencia no ámbito do apoio á I+D de tipo privado. Dende a súa posta en marcha, contribuíu á mellora do nivel tecnolóxico dunha chea de empresas, baseando unha boa parte da súa actividade no contacto directo cos responsables das mesmas (achegándolles asesoramento e orientación á hora de demandar recursos de apoio). A cita do día 11 de xuño en Santiago responde a esta arela de proximidade.
A Ronda CDTI-FEUGA vén da man da Fundación Empresa-Universidade Galega (FEUGA) e nela participarán técnicos do Centro para o Desenvolvemento Tecnolóxico Industrial. Vai dirixida a emprendedores e empresarios en proceso de desenvolver e materializar unha idea innovadora, ofrecéndoselles a oportunidade de contrastar o seu interese e adecuación aos requirimentos de financiamento esixidos polo centro. O miolo da xornada serán as xuntanzas bilaterais entre empresas e técnicos do CDTI. Previamente exporanse os principais programas de apoio orzamentario para empresas do devandito centro.