Microsoft recoñece un proxecto sobre o cambio climático dun investigador da UVigo

Microsoft vén de recoñecer un proxecto galego sobre o cambio climático. Trátase dun traballo que vén da man de Juan Antonio Añel, investigador do Grupo EPhysLab da Universidade de Vigo e da University of Oxford. Grazas á distinción do xigante de Redmond, inserida na convocatoria Microsoft Azure for Research Award destinada a apoiar proxectos de investigación, Añel terá á súa disposición e de balde diversos recursos de cálculo dos centros de datos da multinacional.
Segundo informa máis en detalle a Universidade de Vigo, o galardón recibido na última edición da convocatoria, permitiralle ao investigador realizar durante un ano un número de simulacións moi elevado e dar deste xeito un chouto significativo no estudo dos fenómenos climáticos adversos en relación co cambio climático.
O proxecto no que traballa Añel dende a Universidade de Oxford, ClimatePrediction.net, é en palabras do investigador “o maior experimento de modelación climática mundial”. Tendo en conta o seu alcance e implicacións, precisa dunha importante achega tecnolóxica que forneza altas potencialidades de cálculo e simulación. Isto conséguese botando man dos computadores persoais de múltiples usuarios, que colaboran instalando un software dende a Rede para pór o seu gran de area nos desenvolvementos das simulacións. Malia todo, sinala Añel, “hai casos nos que é preciso facer moitas destas operacións, e son tan custosas que non abondan nin os computadores persoais en rede nin os grandes supercomputadores”. É aí precisamente onde se fai necesaria a concorrencia dunha empresa como Microsoft. Neste caso concreto, a empresa porá en xogo os seus recursos de computación na nube, precisos para o desenvolvemento de certas operacións de gran complexidade.
No proxecto gañador da convocatoria, titulado Climate Prediction Azure Cloud, o obxectivo é “realizar un número de simulacións climáticas enorme, máis aló do común ata o de agora en estudos de sensibilidade do clima, e aumentar a precisión coa que viñamos traballando normalmente nos nosos estudos de impacto do cambio climático”. Os recursos que empregarán para acadalo serán de cálculo na nube. Segundo reflicte a Uvigo facéndose eco das declaracións do investigador, “en lugar de usar un supercomputador o que faremos será replicar miles de computadores persoais que farán simulacións cuns requisitos que superarían as posibilidades da maioría dos ordenadores que se venden para uso doméstico hoxe en día”.