As impresoras en 3D e os coches conectados, protagonistas do arranque das JAI en Vigo

Este luns 3 de novembro comeza oficialmente a sexta edición das Xornadas sobre Tecnoloxías e Solucións para a Automatización Industrial (JAI). A cita é no auditorio AFundación de Policarpo Sanz (Vigo) e arranca con tres relatorios sobre a evolución das ditas tecnoloxías en diferentes ámbitos fabrís. Previamente (arredor das 11.30 horas) celébrase o acto oficial de inauguración dos encontros, unha cita que conta coa presenza (entre outros persoeiros) do reitor da Universidade de Vigo, Salustiano Mato, Xesús Vázquez, conselleiro de Educación, e Abel Caballero, alcalde de Vigo. Tamén está prevista unha recepción na entrada do centro social AFundación, onde estará situada unha das impresoras 3D da UVigo e cuxo funcionamento será amosado en detalle perante os persoeiros participantes na apertura oficial.
A continuación, virán os relatorios e as mesas redondas propiamente ditas. ENCE Pontevedra falará dos últimos avances postos a disposición das súas plantas de celulosa e, a continuación, PSA Peugeot Citroën afondará nas particularidades do seu coche conectado (do que falamos en Código Cero salientando as contribucións do Centro Tecnolóxico de Automoción de Galicia -CTAG- e do obxectivo do proxecto: un vehículo intelixente que sexa quen de dialogar e interactuar co condutor á hora de resolver todo tipo de complexidades na estrada). Ademais, ITGlas amosará en detalle as presentes e vindeiras aplicacións das Google Glass no ámbito das aplicacións industriais.

Polo tanto, o arranque das xornadas JAI permitirá coñecer de primeira man potencial tecnolóxico de Galicia, xa que ademais das experiencias de EMCE, o CTAG e PSA, tamén se contará coas achegas de AIMEN (o seu proxecto Fisiorob), Gradiant (avances en posicionamento de interiores e realidade aumentada) ou da Universidade de Vigo e dos investigadores que están a dar forma ás pezas do satélite FemtoXat ou a impresora 3D gañadora do premio MachineStruxure.
As xornadas, organizadas polo Departamento de Enxeñaría de Sistemas e Automática da Escola de Enxeñería Industrial, ata o 7 de novembro e son, segundo fai saber o principal impulsor do evento, o profesor da UVigo Ignacio Armesto, “un referente como punto de encontro entre as empresas do sector, os profesionais e os investigadores e estudantes de enxeñaría”.
Entre as empresas que terán presenza nesta sexta edición están algunhas das máis representativa do sector da automatización como ABB, Beckhoff, Bosch Rexroth, Harting, Kepware, Kuka, MatrikonOPC, Omron, Phoenix Contact, Rockwell Automation, Schneider Electric, Siemens, WEG ou Wonderware. A organización conta arestora con máis de 200 alumnos e alumnas inscritos.
Un dos proxectos máis rechamantes desta edición será o Fisiorob, do centro AIMEN, do que falamos recentemente en Código Cero. Trátase dun robot colaborativo que actúa nos procesos de recuperación fisioterapéutica. É froito da colaboración entre POVISA, a firma galega Balidea e a Universidade de Vigo, entre outras entidades, e o seu obxectivo desenvolver unha solución baseada na combinación da robótica con contornas virtuais de rehabilitación, para o seu uso na recuperación da mobilidade das extremidades superiores de pacientes con necesidade de rehabilitación neuromotora.
Igualmente, poderase observar o funcionamento de dous proxectos desenvolvidos por Gradiant. O primeiro deles é un sistema de localización en interiores que, a través de balizas e un localizador permite triangular a posición do que queiramos nun espazos pechado empregando unha tecnoloxía de baixo custe. O centro tecnolóxico achegará tamén outro proxecto de realidade aumentada ou animación sobre realidade que ten utilidade, por exemplo, en tarefas de mantemento industrial. Por outra banda, lembrar tamén que a Universidade acudirá ás xornadas coa impresora que se emprega para fabricar parte das pezas do satélite FemtoXat.