En breve poderemos facer videoconferencias de Skype directamente dende o noso navegador web

Para facilitar a comunicación multimedia a través da Rede dende Microsoft levaron Skype a aplicacións para ordenadores, móbiles, televisores e consolas de videoxogos, e para continuar a espallar esta plataforma, anuncian que están a preparar unha nova versión da aplicación de correo instantáneo e conferencias de audio e vídeo que funcionará directamente no noso navegador web sen ter que instalar software adicional, o que fará aínda máis doado conectar con amigos e compañeiros de traballo ao longo do mundo.
Skype for Web está aínda en beta, e resultará de grande utilidade para quen, por exemplo, queira comunicarse coa familia ou os amigos cando se atope fronte a un ordenador público, xa que non precisaría da instalación de aplicacións para poder empregar esta ferramenta.
Deste xeito chegaría con identificarse en Skype.com para poder comezar a chatear cos amigos, e no caso de contar cun navegador web Internet Explorer, Chrome, Firefox ou Safari, tamén poderemos establecer videoconferencias.
Polo momento o número de usuarios que poden acceder a esta versión de proba é moi limitado, e irase ampliando a todos os usuarios de Skype no mundo de xeito gradual. Os usuarios aceptados no programa de beta recibirán unha invitación cando se identifiquen dentro da aplicación.