Twitter estrea anuncios en vídeo de aplicacións móbiles

Non é ningún misterio que a teima de Twitter por introducir vídeo nativo nas cronoloxías dos seus usuarios estaba proxectado para a súa explotación publicitaria, e en vista do interese que pode ter especialmente para as empresas que se dedican á venda de aplicacións móbiles, veñen de estrear un novo formato publicitario para a súa plataforma: a Video App Card.
Trátase dun novo elemento que consiste en recadros de vídeo que se reproducen automaticamente para amosar aos usuarios unha aplicación móbil en funcionamento, captando así unha grande atención, e coa grande vantaxe de que integra un botón para poder ir á correspondente tenda de aplicacións para descargala, o que segundo datos internos de Twitter pode chegar a triplicar a ratio de conversión de ligazóns a aplicacións, de xeito que estariamos ante unha ferramenta promocional de grande atractivo.
Anunciar aplicacións móbiles a través de Twitter parece algo bastante atinado, xa que o 90% dos vídeos que se reproducen en Twitter vense no móbil, e se sumamos a iso que este tipo de ferramentas poden segmentar o seu público por intereses, palabras chave, dispositivos e localización, conséguese unha eficiencia moi boa para certas campañas publicitarias moi visuais.
Este novo formato está agora dispoñible a escala global, despois de que Twitter o probase de xeito limitado cun grupo de anunciantes escollido, que recibiu as Video App Cards moi ben, confirmando o seu bo funcionamento.