Windows 10 xa está instalado en máis de 200 millóns de dispositivos

Microsoft abriu a semana anunciando que o seu sistema Windows 10 atópase instalado a día de hoxe en máis de 200 millóns de dispositivos en todo o mundo. Esta cifra e o medre da mesma, por certo, experimentaron un importante impulso na celebración do pasado Black Friday, que segundo apunta a compañía engadiu un 40% de novos dispositivos con Windows 10. Para Microsoft, non cabe dúbida de que o sistema encarrila o vieiro axeitado, e máis se temos en conta que Windows 10 é a versión do software de todas as achegadas pola compañía que amosa unha traxectoria de implantación máis rápida. Máis polo miúdo, a súa taxa de adopción é un 140% máis rápida cá de Windows 7 e un 400% máis cá de Windows 8.
Segundo engade a multinacional, o éxito de Windows 10 nos eidos empresariais e do ensino “tamén é visible arestora”. Así, máis do 76% dos usuarios empresariais de Microsoft contan con programas piloto de Windows 10, e máis de 22 millóns de dispositivos de empresas e de usuarios centrados en educación teñen instalada a última versión do sistema.
Como lembraremos, a versión Windows 10 foi lanzada por Microsoft o pasado verán, presentándose no mundo cunha serie de novidades a ter en conta, por exemplo a súa vertente multiplataforma estándar (serve para calquera dispositivo electrónico, mesmo sen pantalla) e o seu potencial no ámbito da mobilidade (achega un mesmo sistema independentemente do dispositivo empregado en cada momento (tableta, portátil, teléfono, etc).