O youtuber máis célebre do mundo funda unha rede de creación de contidos amparado por Disney

Hai preto dun par de anos Disney mercou Maker Studios como unha aposta polo fenómeno dos youtubers que están a revolucionar o audiovisual, e avanzando nesta mesma liña amplía agora o seu acordo co youtuber máis célebre do mundo, PewDiePie, co lanzamento de Revelmode, unha nova rede de lecer que achegará contidos de Felix Kjellberg e algúns dos seus amigos, nunha serie de series orixinais que desenvolverán en colaboración cos mencionados Maker Studios.
Dende Maker Studios confían en que o talento dos creadores acubillados baixo a rede Revelmode abra unha chea de posibilidades para esta nova plataforma que orienta os seus contidos ás tendencias emerxentes na cultura audiovisual actual. Os contidos creados pola nova rede distribuiranse a través da web, YouTube, Facebook e outras plataformas, e para estrear o proxecto contará cunha serie de animación que estará protagonizada por PewDiePie e os creadores que o acompañan non proxecto, que inicialmente serán CinnamonToastKen (Ken Morrison), CutiePieMarzia (Marzia Bisognin), Dodger (Brooke Lawson), EmmaBlackery(Emma Blackery), JackSepticEye (Sean McLoughlin), Jelly (Jelle van Vucht), Kwebbelkop (Jordi van den Bussche) e Markiplier (Mark Fischbach), que suman máis de 100 millóns de seareiros en YouTube, Facebook, Twitter, Instagram e Snapchat.