AGEe critica o Mercado Único Dixital e di que non está feito para as PEME

Estes días, ata mañá, estase a debater no Parlamento Europeo, en sesión plenaria, acerca de cuestións de importancia para o futuro a medio prazo da UE. Entre as cuestións figura o Mercado Único Dixital, do que se debateu arreo este martes. No punto de mira estivo a proposta da Comisión para concretar o Mercado Único Dixital, unha estratexia para, sobre o papel, mellorar o acceso dos consumidores e as empresas aos bens e servizos dixitais de toda Europa e maximizar o potencial de medre da economía dixital. Para o grupo galego AGEe, esta liña de traballo económica agocha, revestida de obxectivos de crecemento, tentativas para incrementar o consumismo “e a preponderancia da economía financeira sobre a real”. Segundo engade a agrupación política, a Comisión quere deseñar nesta lexislatura un espazo comercial que consiste “en eliminar as barreiras ás transaccións efectuadas en liña”. Isto é, sinala, o Mercado Único Dixital.
En palabras da eurodeputada galega Lidia Senra, “o Mercado Dixital Único significa o expoñente máximo da liberalización comercial intracomunitaria aumentando inda máis a deslocalización produtiva”. Na súa opinión, “dar pulo a esta proposta cando inda non está garantida a neutralidade na Rede, cando non se están facendo apenas esforzos dende a UE por fomentar o software libre e cando se adoece dunha fenda dixital enorme dentro dos Estados e entre os países membro, revela que este mercado é unha proposta de negocio feita á medida para os grandes capitais; pensando nas grandes transnacionais e nas empresas, non nas persoas ou nas PEME”.
Segundo fixo saber, o proxecto para dar forma a este macroespazo comercial virtual amosa claras eivas dende a súa orixe. De feito, dixo, “non está a resultar integrador con respecto a opcións actuais de importante valor social, como o pequeno comercio ou os mercados locais”. Así, explica, “nesta proposta fálase mesmo de establecer redes de puntos de recollida para a paquetería transfronteiriza; onde queda neste esquema o pequeno comercio? Por que deberiamos establecer redes de recollida en vez de manter a compra a través dos comercios físicos e, sobre todo, do comercio local?”.