Os usuarios de Libra xa poden achegar solucións ecommerce aos seus distribuidores

Edisa vén de anunciar unha nova mellora no seu software de xestión empresarial Libra: unha novidade directamente encamiñada a facilitar aínda máis a operatividade dos usuarios no ámbito do comercio electrónico. En concreto, a firma galega ampliou as funcionalidades do seu módulo e-commerce enfocado ao desenvolvemento de multitendas de comercio electrónico. Dentro desta ampliación deseñáronse ferramentas creando un único portal web sobre o que se serven diferentes establecementos. Segundo informa Edisa, cada unha destas tendas é propiedade dun cliente alleo á empresa usuaria de Libra.
Polo tanto, mediante esta nova funcionalidade unha empresa que a día de hoxe empregue a dita plataforma de xestión poderá ofrecer aos seus clientes a posibilidade de despregar unha web que incorpore os produtos que proceda para ofrecer aos seus respectivos clientes.
A modo de exemplo, Edisa ilústranos co caso hipotético dunha empresa usuaria de Libra adicada á venda de material deportivo. En virtude das novas funcionalidades, esta firma podería pór en xogo a posibilidade de que os seus clientes (puntos de venda de material deportivo) dispoñan da súa tenda en liña aproveitando toda a información de produtos que se xera dende Libra. “Cada unha destas tendas ou portais B2C, poderán ter diferente aspecto, diferentes prezos de venda, pero todos estes portais estarán integrados automaticamente”, engade a firma galega.