Imatia celebra este sábado na FIC o desafío para estudantes Innovation Challenge

Imatia Innovation organiza este sábado 27, na Coruña, a primeira edición do evento I´m Innovation Challenge. Trátase, en palabras da dita empresa galega, dunha iniciativa directamente encamiñada a fomentar e amosar a creatividade e a innovación dos nosos estudantes. O evento, no que tamén colabora a Facultade de Informática da Coruña, xorde “do máis profundo compromiso” de Imatia Innovation coas universidades galegas. Máis en detalle, consiste no desenvolvemento dun proxecto en grupos de dous alumnos, pertencentes á materia de Recuperación de Información e Web Semántica (RIWS).
Cada equipo presentará o seu proxecto nunha exposición oral de 15 minutos perante un xurado formado por representantes de Imatia e persoal docente da Facultade de Informática. Tralas presentacións e a deliberación do xurado procederase á entrega do premio. Aos gañadores concederáselles unha bolsa de prácticas remuneradas en Imatia; ademais de agasallalos cunha tarxeta regalo por valor de 500 euros.
O evento comezará ás 10 horas e desenvolverase ata as 14.30 horas do sábado. Celebrarase na aula do MUEI, Máster Universitario en Enxeñaría Informática, no Edificio de Área Científica da Facultade de Informática da Universidade da Coruña.