O futuro dos ecosistemas dixitais, ao detalle en Económicas da USC

O ex reitor da Universidade de Alacante e conselleiro delegado de Universia (o Portal das Universidades Españolas), Andrés Pedreño, intervirá hoxe no mestrado en Márketing Dixital da Universidade de Santiago coa conferencia Tres ecosistemas dixitais (o web, o web social e as apps) e as súas implicacións para economistas e emprendedores. A charla, de entrada libre, desenvolverase ás 16:00 horas no salón de graos da Facultade de Ciencias Económicas e Empresariais. No seu relatorio, Pedreño debullará as características e as posibilidades de futuro (futuro compartido e en equilibrio) dos devanditos tres ecosistemas. Máis en detalle, avaliará a crise da Internet e o espallamento do móbil.
Andrés Pedreño é catedrático de Economía Aplicada da Universidade de Alacante, da que foi reitor entre 1993 e 2000, conselleiro delegado de Universia (2000-2004) e encargado de definir o proxecto e a súa expansión a dez países. Impulsor de numerosos proxectos dixitais, fundou a primeira biblioteca dixital do mundo hispano (Biblioteca Virtual Miguel de Cervantes) e a primeira plataforma MOOC en España, Europa e América Latina (UNIMOOC), hoxe con 200.000 emprendedores. Dirixe o Observatorio ADEI para o desenvolvemento da Economía Dixital en España, con Google e AFI.