Vitae achega na Coruña un curso sobre selección avanzada de perfís profesionais TI

Vitae Consultores vai organizar na Coruña un seminario sobre recursos para asegurar que acadamos nas nosas empresas os mellores profesionais e, en consecuencia, a máxima calidade nas nosas iniciativas de mercado. Trátase do curso Selección e Avaliación Avanzada de Perfís TI baseadas na Neurociencia (PDF), unha actividade coa que se quere dar reposta a unha demanda crecente entre o sector das novas tecnoloxías da información (dada a escaseza de oferta no mercado laboral: a demanda das máis axeitadas metodoloxías para incorporar os perfís máis indicados e acaidos. Neste obradoiro, informa Vitae, “proporcionaranse métodos e ferramentas coas que xa se conseguiu unha porcentaxe de éxito de máis do 90% en selección de perfís TIC, incluíndo perfís técnicos, perfís de xefes de proxectos, perfís de desenvolvemento de negocio e perfís de alta dirección”.
En definitiva, a actividade formativa diríxese a permitirnos solucionar o devandito reto e termos “un criterio a seguir para saber en que aspectos ceder e en canles non ceder na contratación dun candidato ou candidata ou na promoción de un dos nosos profesionais”.
O curso encamíñase a ampliar a formación de directores, xefes de proxectos, xerentes ou profesionais dos recursos humanos, ou ben a calquera profesional que desexe adquirir as habilidades e coñecementos precisos e máis a axeitados para a selección e avaliación tanto de perfís TI como de calquera sector.
O obradoiro celébrase o vindeiro venres 8 de abril en horario de 9.30 a 13.30 e de 15.00 a 19.00 horas no Hotel Attica 21 da Coruña. O encargado de impartir os contidos será Marcos Carbonell, profesional con máis de trinta anos de experiencia nos sectores do deporte, das tecnoloxías da información e dos recursos humanos. Dende 2006 é socio director de Vitae Consultores. Foi responsable, directa ou indirectamente, de máis de 1.000 procesos de selección, cunha taxa de éxito de máis do 90%.