WeKAb leva a Expoformación a súa experiencia en procura e contratación de formadores

Este 3 de marzo daba comezo ExpoFormación 2016, o foro estatal de referencia para provedores de formación que se celebra parello ao IX Congreso Nacional de Formación Continua. Cómpre informar que esta edición da ExpoFormación ten lugar no Palacio Municipal de Congresos de Madrid e estenderase ata mañá sábado día 6 de marzo. No encontro en cuestión hai presenza galega, como a da startup galega WeKAb, con sede en Monterroso (Lugo) e oficinas na Coruña. A firma amosou o seu caso de éxito particular, cunha plataforma do mesmo nome que pon en contacto a expertos e formadores con empresas formadoras, “de forma áxil e co factor reputación como eixe central”.
Máis en detalle, o segundo relatorio de onte en Expoformación veu da man Juan Diego Pereiro Areán, director executivo (CEO) e fundador desta empresa galega. Na súa intervención Pereiro Areán subliñou a importancia do docente como figura clave na formación e expuxo a súa solución para a procura e contratación de formadores do século XXI, salientando a axilidade e reputación como elementos esenciais destes procesos.
En canto a WeKAb, dicir que ten un ámbito de actuación estatal e previsións de internacionalización. Arestora conta con máis de 4.700 formadores e 165 entidades de formación en toda España. A ferramenta tecnolóxica WeKAb.com, como dixemos, fai posible que os profesionais de calquera área de coñecemento poidan darse a coñecer, xerar reputación e formarse como formadores, á vez que fai máis doado o acceso aos mesmos a empresas e entidades formadoras.
WeKAb é un proxecto cualificado como IEBT (Iniciativa de Emprego de Base Tecnolóxica) pola Xunta de Galicia e foi acelerado a través do programa Galicia Open Future de Telefónica, en colaboración coa Axencia para a Modernización Tecnolóxica de Galicia (AMTEGA), a Axencia Galega de Innovación (GAIN) e o Instituto Galego de Promoción Económica (IGAPE).