Vodafone estrea receptor de televisión en ultra alta definición

Aínda que os contidos televisivos en Full HD aínda non son tan habituais como nos gustaría, hai quen xa demanda material en ultra alta definición (UHD), e para poder así tirar proveito dos novos televisores hoxe comeza a comercialización de receptores de televisión 4K por parte de Vodafone, inicialmente para os clientes de ADSL. Pero o dispositivo non chegará so, senón que contará con contidos de calidade, concretamente a través de 4 canles UHD: Festival 4K (de temática musical), Fun Box 4K UHD (con documentais, deportes extremos, series e películas), Slow Channel (canle de acompañamento e contemplación de imaxes impactantes) e Insight TV (con series, deportes, documentais, ciencia e programas interactivos).
Aínda que a ultra alta definición pode parecer o máis importante deste anuncio, posiblemente non sexa así, xa que o realmente importante é o feito os clientes con xDSL de Vodafone poidan acceder a unha ampla oferta audiovisual con ata 120 canles (con máis da metade en alta definición), con numerosos contidos baixo demanda e aplicacións como Netflix, ou sexa, que Vodafone estaría a igualar a súa oferta televisiva para todos os seus clientes.