Lugo contará cunha app para facilitar a xestión intelixente do aparcamento

O ambicioso proxecto intelixente da Cidade da Muralla, Lugo Smart City (do que falamos onte en Código Cero para salientar o pulo estatal recibido e o investimento co que parte, 4,1 millóns de euros), abrangue entre as súas moitas medidas o despregamento de tecnoloxía para facer máis doado e eficiente aos condutores o proceso de busca de aparcadoiro. E todo a través dos seus móbiles. Esta iniciativa (Xestión intelixente do aparcamento) centrarase para comezar nun emprazamento céntrico da cidade e dando cobertura, nos seus primeiros pasos, a 200 prazas de aparcadoiro. En termos máis concretos, contempla a instalación dunha rede de sensores sen fíos instalados no asfalto que detectarán o peso dun vehículo.
A devandita información obtida servirá para indicar se existe ou non unha praza libre de aparcadoiro. Isto canalizarase a través dunha aplicación móbil específica (unha app), que contará cun sistema de guiado ata a praza libre máis próxima. O orzamento do que dispón esta iniciativa é de 267.000 euros. O Concello, malia toda a información achegada sobre Lugo Smart City, non forneceu a localización exacta onde se vai despregar esta tecnoloxía. Prevese, iso si, que será nunha zona próxima ao centro. Segundo se avanza nos medios de comunicación, o servizo será de balde para a cidadanía e serviría, en gran medida, para desconxestionar o tráfico e reducir tránsito e contaminación. A medida, en certo sentido, seguiría o ronsel doutras experiencias semellantes levadas a cabo en cidades como Compostela, onde, como lembraremos, habilitouse unha proba piloto na avenida de Barcelona, botando man de tecnoloxía galega para móbiles (a aplicación galega Apparcar).