Xa xeramos 17 quilogramos de RAEE ao ano

A presenza dos chamados RAEE (Residuos de Aparellos Eléctricos e Electrónicos) comeza a ser máis que preocupante en España. Ou mellor dito: a presenza deles en emprazamentos que non teñen a capacidade para darlles o debido e correcto tratamento de reciclaxe. Segundo datos achegados por Nacións Unidas e Eurostat, cada cidadán español xera de media 17 quilogramos de refugallos electrónicos ao ano. Ademais, estas entidades estiman que o volume de residuos desta índole está a medrar nunha porcentaxe do 20% cada ano. A día de hoxe, trátase dos desperdicios que máis crecen.
O termo RAEE, como lembraremos, abrangue a todos aqueles aparellos que empregan electricidade ou baterías e que polo tanto están presentes por decenas nos fogares. O abano de trebellos é, polo tanto, tan amplo como nos poidamos imaxinar: cepillos eléctricos, mandos a distancia, cámaras dixitais, ventiladores, deshumidificadores, reprodutores de música, móbiles, cargadores, computadores, monitores, ratos, teclados, discos duros, etc.
As causas do medre dos RAEE en España teñen que ver, por suposto, cun aumento do consumo de tecnoloxía. Isto non tería máis problema sempre e cando houbese políticas efectivas e rendibles para favorecer a reciclaxe. O problema é que o consumo semella exceder estas políticas. Segundo lembran dende a iniciativa compostelá A Tropa Verde, unha das consecuencias máis deste proceso é que a inmensa maioría dos aparellos electrónicos conteñen elementos tóxicos como o bromo, cadmio, fósforo ou mercurio, que se non se tratan de maneira axeitada poden provocar grandes danos ao medio ambiente e á saúde das persoas.