A galega Ednon leva as tecnoloxías máis punteiras a Panamá

A firma galega Ednon, centrada no desenvolvemento de novas tecnoloxías avanzadas, vén de achegar un reconto da súa actividade despregada en Panamá, unha andaina centroamericana da que falamos polo miúdo en Código Cero con motivo de anunciar a súa contribución para a posta en marcha dun megahospital. Segundo informan fontes da compañía, a súa traxectoria no devandito país, lonxe de rematar, segue adiante e coas mellores expectativas. De feito, logo da súa participación no dito complexo de saúde e nas obras recentes da Canle de Panamá (instalando sistemas de vixilancia e megafonía), Ednon acadou a adxudicación doutros dous proxectos tecnolóxicos en activo ata 2018.
Como lembraremos, a firma ten a sede central en Compostela e delegacións en Valladolid, Madrid e Cidade da Panamá. A súa actividade céntrase sobre todo nos ámbitos da seguridade, as comunicacións e os servizos TIC avanzados.
Polo que respecta aos proxectos adxudicados, sinalar que un deles consiste en fornecer recursos para a xestión do sistema de control de accesos de vixilancia da devandita Cidade da Saúde, macrocomplexo onde Ednon tivo oportunidade de fornecer igualmente equipamento de distribución, sistema de cable estruturado e electrónica de rede. O outro proxecto conseguido implica o desenvolvemento de traballos de consultoría para a plataforma de Sistemas do Ministerio de Sanidade de Panamá.
Polo que atinxe a Ednon, dicir que é unha empresa galega especializada na integración de servizos avanzados TIC. Fundada no ano 2004, e de capital privado independente, opera en todo o territorio español a través das súas oficinas en Santiago de Compostela, Valladolid e Madrid e no eido xeográfico Latam&Caribe a través da súa filial Ednon International, S.A. localizada en Panamá, país onde encetou a súa andaina hai agora seis anos e grazas ao cal obtén xa boa parte da súa facturación.