Turismo de Ferrol levou a realidade aumentada ás Meninas de Canido

O Concello de Ferrol, a través da Concellería e Turismo, impulsou unha iniciativa para reivindicar As Meninas de Canido a través das novas ferramentas dixitais. Foi, segundo fixo saber o concelleiro Bruno Diaz, unha proposta para achegarlle “un valor engadido” ao devandito certame pictórico e cultural, celebrado esta fin de semana que vimos de deixar atrás. Este “valor engadido” consistiu en facer que As Meninas “cobrasen vida”, ao permitir a aplicación móbil desenvolvida (e dispoñible xa dende o pasado venres) fornecer movemento ás obras artísticas mediante técnicas de realidade aumentada.
Segundo fixo saber Díaz, a iniciativa encamíñase a “incrementar o atractivo turístico das Meninas de Canido”, certame que estes días encheu de actividade artística, música e arte o devandito barrio ferrolán.
Nun plano máis concreto, a aplicación Visuar permitiu aos visitantes acceder a “un novo e inesperado” xeito de gozar das 18 Meninas habilitadas: enfocándoas, o público tivo ocasión de velas moverse ou mesmo bailar. A ferramenta foi realizada por Ecosistema 3D, unha empresa de Ferrol, de Canido concretamente, segundo destacou Bruno Díaz, que engadiu que o que se pretendía era “contribuír e poñer valor esta iniciativa para as persoas que veñen todo o ano ás Meninas, engadindo valor a unha visita que está constatado que ten un interese turístico moi importante”. No acto de presentaicón, o propio impulsor das Meninas, Eduardo Hermida, salientou moi positivamente a posta en marcha desta realidade virtual que permite “modernizar e actualizar todo o que significa a pintura”.