O programa Re-acciona TIC facilitará a dixitalización das PEME galegas

O director do IGAPE, Javier Aguilera, e a directora da AMTEGA, Mar Pereira abriron esta mañá na Cidade da Cultura a xornada técnica centrada en presentar as novidades dos programas Re-acciona e Re-acciona TIC, que buscan dar resposta ás demandas de mellora e profesionalización das PEME Galegas no ámbito da industria 4.0.
O director do IGAPE lembrou que a Xunta de Galicia está a impulsar a Axenda da Competitividade Galicia-Industria 4.0 para procurar que as empresas, especialmente as PEME, dean o salto cualitativo necesario para avanzar no ámbito da cuarta revolución industrial en curso. Salientou tamén a importancia de instrumentos como os servizos achegados polo programa Re-acciona para avanzar en aspectos como a xeración de modelos e simulación industrial ou a posta en marcha de solucións 4.0 nas empresas.
Aguilera destacou que o programa Re-acciona pon a disposición das PEME un conxunto amplo de servizos para facilitar a implantación de proxectos de mellora en ámbitos como a optimización do financiamento, o desenvolvemento estratéxico integral, a redefinición do modelo de negocio, a optimización de procesos de produción e cadea loxística, o relanzamento comercial, os protocolos de sucesión na empresa familiar ou a identificación de aliados e redes de cooperación.
Pola súa banda, a directora da AMTEGA afirmou que un dos obxectivos do Re-acciona TIC é facilitar a PEME e autónomos a dixitalización do seu negocio e a aplicación de solucións industria 4.0 da man dunha rede de axentes colaboradores, integrada por empresas tecnolóxicas, que os asesorarán e os acompañarán en todo o proceso.
Mar Pereira destacou que, para conseguilo, o Programa ofrece un catálogo de servizos, a un prezo reducido, que abrangue desde a diagnose do grao de modernización tecnolóxica e a identificación das oportunidades de mellora que permitan incrementar a competitividade da empresa, ata servizos de soporte para a implantación de solucións de mobilidade para a incorporación de solucións TIC orientadas mellora da xestión empresarial; e para a implantación de solucións de marketing dixital que permitan optimizar a presenza da empresa en Internet.
O programa está aberto para recibir solicitudes das empresas interesadas, que disporán de sucesivas convocatorias, durante os vindeiros meses, para presentar a súa solicitude.