Os trens AVE comezan a achegar servizo Wi-Fi con contidos de Movistar+

Semella que xa podemos dicir sen temor a trabucarnos que os trens AVE contan xa con servizo operativo de acceso á rede sen fíos, ou sexa servizo de cobertura Wi-Fi, un “engadido” que, cos tempos que corren (agora que practicamente a totalidade dos viaxeiros empregan os seus dispositivos para comunicarse, traballar ou informarse), xa tardaba un pouco de máis. A cobertura, que chega un ano despois da súa presentación, achégase durante un mes en fase de probas: dende onte ata o 3 de decembro.
A tecnoloxía arranca en cinco trens e faino con contidos subministrados directamente por Movistar+. Estes contidos, por certo, non se descontarán dos Mb que se nos ofrezan.
Haberá dúas opcións de “Renfe-WiFi”. Por unha banda a gratuíta (20 Mb de conexión total) e outra de pago (100 Mb). Nas dúas teremos un catálogo previo pago de Movistar+. Para poder gozar desta programación (filmes, partidos, series, documentais) teremos que descargar a aplicación PlayRenfe, arestora só dispoñible para dispositivos Android. Na modalidade de balde poderemos conectar un só dispositivo, mentres que na opción Premium estaremos en disposición de ligar ata tres dispositivos.