O novo equipo directivo do CLAG quere facer do audiovisual galego unha industria 4.0

O Clúster Audiovisual Galego (CLAG) vén de renovar directiva e, co novo equipo de goberno, os seus obxectivos de afianzarse na Industria 4.0 e dos contidos dixitais (un eido temático do que estamos falando arreo, estes días, con motivo do evento DICO Summit 2017 co-organizado precisamente polo CLAG). O novo presidente da entidade, Jorge Algora, produtor e socio fundador de Adiviña Producións, substitúe no seu cargo a Andrés Barbé, que ostentou a presidencia dende 2010. Foi elixido por unanimidade para este posto á fronte do CLAG durante a asemblea xeral extraordinaria celebrada hoxe mesmo en Santiago. O presidente entrante louvou o gran labor despregado por Andrés Barbé e os seus esforzos para consolidar actuacións estratéxicas en materia de busca de novos mercados, de innovación e de modernización do sector. A intención de Algora é afianzar estes logros e avanzar aínda máis nos camiños que abren as novas tecnoloxías.
Algora e o seu equipo anunciaron tamén que manterán os proxectos estrela do CLAG (por exemplo o pitching I+P, Ideas para producir) e avanzarán no diálogo coas asociacións e outros axentes do sector para “atopar canles de colaboración e accións específicas que contribúan a estruturar o sector como unha industria 4.0”. A nova directiva tamén avanzou a súa arela de impulsar proxectos tractores tanto no eido da produción, como da innovación, ou a I+D (Investigación e Desenvolvemento), que acaden a especialización das empresas, “actuando como aceleradora de proxectos que persigan o interese dun mínimo de tres empresas”. Ademais, propuxeron crear unha rede de compañías doutros sectores “amigas do audiovisual galego” e que poidan apoiar accións de promoción ou financiamento de proxectos.
A nova xunta directiva do CLAG está composta por presidente: Jorge Algora (Adiviña Producións); tres vicepresidentes: Miguel Conde (Congo Producciones), Alfredo Alemparte (Setemedia Producciones Audiovisuales) e Juan de Dios Serrano (Agallas Films), que actuará tamén como tesoureiro, e unha secretaria e xerente do CLAG, Mar Varela. Completan o equipo catro vogais: Ramón Basanta (CESGA), Aquilino Abeal (Aeromedia), Margarita Soilán (Fundación TIC Lugo) e Manuel Sanmartín (Areca Films).