A ANPA do IES de Coroso (Ribeira) programou en maio obradoiros para garantir usos positivos das redes sociais

A ANPA Caramecheiro Nº1 de Ribeira segue adiante coa súa completa axenda de actividades destinadas a mellorar a convivencia e a aprendizaxe en positivo, ademais do respecto nas aulas e a comunicación, achegando recursos que poidan ser extrapolados a outros centros. En maio a comunidade de nais e pais do instituto de Coroso vai poñer o foco na necesidade de fomentar experiencias dixitais saudábeis e enriquecedoras. “A adolescencia é unha etapa clave para aprender a xestionar as redes sociais e os medios dixitais”, sinalan dende ANPA, que organizará xornadas sobre esta cuestión os días 13, 14 e 15 de maio, contando coa presenza activa de Sara de Santos, informática especializada en RRSS.
Sara impartirá a familias, docentes e alumnado de 2º da ESO do IES Nº1 de Ribeira obradoiros sobre redes sociais baixo o epígrafe Estamos conectados.
O obxectivo é “proporcionar ferramentas e coñecemento ao alumnado e ás súas familias para navegar polo entorno dixital de maneira segura, emocionalmente saudábel e efectiva”. Ademais, poderán ver de primeira man a manipulación á que está sometida a sociedade actual por parte das empresas e medios.
Ao alumnado aprenderáselle como funcionan as redes sociais (algoritmos, privacidade e seguridade) e o seu impacto emocional (xestión do tempo, saúde mental e como garantir unha relación saudábel coas redes sociais) e mostraránselles técnicas para protexer a privacidade e evitar o ciberacoso e testemuñas dun artista convidado (a través dunha videochamada, artistas emerxentes compartirán cos asistentes como as redes sociais inflúen na su vida e carreira, así como os procesos que viven para xestionalas).
Ás familias ensinaráselles a entender o entorno dixital no que interactúan os seus fillos e filla, como acompañalas/os no uso saudábeis desas plataformas e que ferramentas empregar para protexer aos adolescentes no entorno dixital. Achegarase un diálogo aberto no que responder dúbidas e preocupacións.
Esta actividade será financiada pola Secretaria Xeral de Igualdade coas axudas ás ANPA destinadas á promoción da igualdade entre homes e mulleres e á prevención e rexeitamento da violencia contra as mulleres, en desenvolvemento do Pacto de Estado contra a Violencia de Xénero.