A Biblioteca Pública de Vigo activa un servizo de apoio tecnolóxico para os seus usuarios

A Biblioteca Pública de Vigo Juan Compañel vai comezar o ano con asesoramento tecnolóxico para as persoas usuarias dos seus servizos, co obxectivo de fomentar o apoderamento dixital da veciñanza e axudala nos seus trámites e operacións máis comúns.
Así, dende xaneiro de 2026 actívase na Biblioteca un servizo de apoio para o uso das novas tecnoloxías en calquera dispositivo (ordenadores, móbiles, tabletas) e para aplicacións, páxinas ou redes sociais de utilidade diaria e cotiá. O servizo achegarase para toda a cidadanía, con atención individual por orde de chegada, proporcionando asesoramento segundo as necesidades de cada usuario.
A axuda limítase á parte tecnolóxica e dixital dos trámites, nunca poderá referirse aos contidos.
A dirección da Biblioteca informou de que o servizo xa está activo dende este arrinque de xaneiro.