A Biblioteca de Galicia achéganos a María Casares con dous recursos dixitais

Este luns 21 de novembro inaugurouse na Biblioteca de Galicia (Cidade da Cultura) a exposición María Casares: a conquista da existencia, coincidindo co día no que se cumpren 100 anos do nacemento da actriz galega. O acto, a culminación dun ano (2022) de celebracións arredor de María Casares, foi presidido polo conselleira de Cultura e Educación, Román Rodriguez. Inclúe unha bibliográfica para achegar ao público o percorrido vital da actriz e diversos recursos tecnolóxicos que complementan a mostra (por exemplo os recursos dixitais habilitados na web da Biblioteca de Galicia).
A exposición, que poderá visitarse ata o vindeiro mes de xaneiro, está composta por fondos propios da institución, cun total de 29 libros e oito revistas ás que acompañan material audiovisual como DVD ou discos.
Durante o acto de inauguración, o conselleiro de Cultura destacou “que o amplo programa impulsado pola Xunta para homenaxear os 100 anos do nacemento de María Casares permite demostrar a importancia e a vixencia da súa figura para a historia da cultura galega”.
Román Rodríguez, que estivo acompañado polo director xeral de Cultura, Anxo M. Lorenzo, convidou ao público a gozar da programación do centenario de María Casares en xeral, e en concreto desta mostra que supón “unha oportunidade para que os visitantes descubran de primeira man o moito que se contou e escribiu ao redor da figura da artista”.
A proposta compleméntase con dous recursos dixitais accesíbeis na web da Biblioteca de Galicia, e postos en marcha polas comisarias, Patricia Babío e Carina Fernández. Trátase, por unha banda, dunha bibliografía exhaustiva para completar a escolma realizada para a exposición física, onde se recolle case todo o escrito sobre María Casares ou aquilo no que ela participou. Amais, pódese consultar unha liña temporal da vida da actriz, a través da que é posíbel navegar cronoloxicamente polos principais acontecementos da súa existencia, ilustrados con fotografías, vídeos, ou audios nos que ela é a protagonista ou nos que falan dela.